Annos retro, quando io esseva in Roma, precisemente in le placia de San Petro in le Vaticano, io reguardava verso le Via del Conciliazione, un parve avenue que descende verso le fluvio Tiber. Io tunc pensava a ubi iste direction pointava. Io continuava mi visita per le loco e per le preciose citate de Roma.
Septimanas plus tarde, io rememorava iste pensamento intrigante: verso ubi es orientate le Vaticano? E io comenciava a investigar le subjecto plus a fundo. Io initiava per usar le application Google Earth. Con illo, on pote traciar lineas inter duo o plus punctos. Assi, io decideva designar un prime linea que, partiente del imponente cupola del Basilica de San Petro, sequeva le route central del Via del Conciliazione. Sequente le linea, illo me portava exactemente al entrata del Parlamento Italian. Continuante ultra, io arrivava al Piazza della Repubblica.
Io non videva nihil special ibi, al minus nihil particularmente significative. Io lassava le subjecto pro un altere occasion. E iste occasion arrivava annos plus tarde, quando, viagiante in mi tabletta per le imagines satellite de Google Earth, io occurreva a unir le duo grande cupolas del Vaticano e illo del moschea byzantin (previe basilica) de Hagia Sophia in le actual citate de Istanbul (antea nominate Constantinopole). Mi surprise esseva enorme quando io observava que iste linea passava exactemente per le centro del Via della Concilliazione e super le obelisco que se eleva in le centro del Piazza de San Petro, porta del Vaticano. Io immediatemente pensava: “Io ha trovate le clave del Vaticano.” Ma, es iste strange alineamento un simple coincidentia o esseva illo planificate deliberate?
Assi, io continuava a investigar toto lo que io poteva con respecto a iste alineamento. Certemente, pro facer tal cosa, on debe haber habite cognoscentias geographic solmente possibile in le ultime tres o quatro seculos. Vermente, le Basilica de San Petro, como multe del constructiones que se eleva hodie in le colle vatican, es bastante recente. Le antique basilica jam esseva orientate de iste modo, assi que le nave central sequeva perfectemente iste direction.
Ante que le antique basilica esseva construite, per illo passava le Via Cornelia, cuje traciato coincide con illo del Via del Conciliazione, un moderne avenue que surge post le union del Via Regia Alexandrina (Borgo Nuovo) e le Carreria Sancta (Borgo Vecchio). Inter ambe vias habeva edificios que ha essite demolite pro unir los in un sol, creante un ample avenue.
Quando io observa le planos del antique basilica, io nota alcun detalios que attrahe mi attention. Inter multe de illos—e illos non es pauc—son le Mausoleos de Augusto. Juxta un de illos, il ha un obelisco. Iste obelisco faceva parte del nodo central del antique Circo de Nero, cuje forma esseva concipite pro curras de cavallos e quadrigas. Secundo le tradition, justo ante illo, San Petro esseva executate. In le loco, un capella esseva erigite in su tempore. Hodie, le loco es precisemente in le Via della Sacristia, ubi se eleva le muros del Camposanto Teutonic. Como curiositate, iste parte constitue le frontiera inter le Stato del Vaticano e Italia. Actualmente, le obelisco non es ibi, ni le duo mausoleos. Que ha occurrite con illos? Investigante, io apprendeva que un de iste mausoleos, le plus proxime al obelisco, se converteva in un ecclesia inter le multe que habeva in iste zona. Illo esseva le Ecclesia de Santa Maria della Febbre.
Observa iste pictura de Pieter Jansz Saenredam (1597–1665), facite in 1629. In illo, nos pote vider le ecclesia circular de Santa Maria della Febbre. Iste ecclesia utilisa le structura del mausoleo de Augusto. Observa le constructiones in le fundo. Juxta illos, edificios se eleva. Le obelisco in question es illo que hodie se trova in le centro del Placia de San Petro. Illo esseva movite desde iste loco al sito que illo ora occupa. Le pictura es de 1629, e secundo le historia, in 1626 le apparentia de iste imagine debeva esser differente, pois que le moderne basilica que nos cognosce jam esseva quasi construite, e le obelisco habeva essite movite multe annos antea. Le apparente anachronismo se explica per le facto que Pieter Jansz realisa su oleo sequente le sketches de Maerten van Heemskerck, facite in 1532, de Santa Maria della Febbre.
Pieter Jansz nunquam esseva in Roma. Le movimento del obelisco esseva effectuate in 1586, sub le mandato del Papa Sixto V e le direction del architecto Domenico Fontana. Illo es un obelisco sin hieroglyphos, e on dice, secundo fontes attribuite a Plinio, que illo es original del citate de Heliopolis. Le nove loco ubi illo es situate non es circumstantial. Evidentemente, le tumba de San Petro e le obelisco signala un puncto in le horizonte.
A 1746 metros de distantia (3.333 cubitos real o egypte), se situava un altere obelisco. Iste on habeva hieroglyphos egyptie inscripte. Le obelisco esseva trovate in excavationes effectuate per diverse papas. Le prime in 1502 per Julio II, qui lo re-interrava, e postea des-interrate de novo per Papa Pio VI. In le loco del discoperta, ora se eleva le Campo Marzio Luxury Suites, un hotel ubi sovente pernocta alcun politicos. Nostre linea que uni Hagia Sophia in Istanbul e le Basilica de San Petro in Roma passa exactemente per le loco ubi, antique, iste obelisco se trovava.
Isto significa que nos ha tres punctos de importantia marcate in un linea geographic que uni duo cupolas distante inter se 1.382 km. Un prodezza digne del epocha renaissance o, forsan, del epocha illuminate, ma non anterior. Il es evidente que le Via del Conciliaption pointa directemente verso le antique Constantinopole. E su precision es si stupente que illo exactemente coincide con le Moschea de Hagia Sophia. Si le Basilica de San Petro es le serratura, Hagia Sofia es le clave que aperi le porta al mysterio. Ma de isto nos parlara in un altere occasion.
© Jose Luis Aleman 2025