Le anima de interlingua
Non ha dubita que Interlingua es un projecto linguistic fantastic realisate per un gruppo de expertos de renom, con le scopo de facilitar le communication international sin voler replaciar le linguas national; basate super un vocabulario e grammatica commun al principal linguas europee, specialmente le linguas romanic o latin; es comprensibile pro multe personas sin studio previe e totalmente operative in le sphera scientific e technic.
Tamen, mesmo si illo ha un potentialitate superior al esperanto in alcun aspectos, illo non ha attingite sufficiente penetration in le medios de communication, ni ha habite un grande resonantia in le sphera politic e social. Esperanto habeva, ab le initio, un importante supporto, specialmente proque illo deveniva parte del ideologia del international socialiste. Le manifesto communista supportava con special fervor iste lingua create per un sol homine, le Dr. Zamenhof. Illo correspondeva perfectemente a un del objectivos del utopia socialiste: le implantation de un lingua universal que univa tote le populos e nationes del mundo. Esperanto cresceva impellite per iste movimento, que le dava grande cobertura, financiava multe programmas de apprendimento e faceva grande propaganda positive super le avantagios de iste lingua auxiliar.
Interlingua appare plure decennios postea. Jam habeva projectos simile antea, ma nulle de illos habeva sufficiente successo pro eclipsar le fama e fortia del esperanto. Quando Interlingua appareva, le primer mundo habeva determinate que le anglese esserea le lingua auxiliar con le qual personas de differente nationes poteva communicar. Illo non esseva le melior option, proque su imposition esseva un movimento colonial e comercial impellite per le Superpotentia vincitor del Secunde Guerra Mundial.
A un certe momento on pensava que Interlingua esserea utile como lingua auxiliar del Communitate Europee. Alcun tentativas leve esseva facite in iste direction. Alcun propositiones esseva presentate a nivello politic, ma illos habeva insufficiente resonantia.
Le question es que le differentia inter esperanto e interlingua es que le prime esseva dotate de un anima emotional e compliva un scopo in un nove vision social. Tamen, septe decennios postea, in le seculo XXI e in le Era de Grande Cambios Global pro le Humanitate, Interlingua pare esser dotate, paulatim, de un anima.
Interlingua non es le lingua universal, non pretende esser tal cosa. Illo non representa le mesme valores que esperanto, con su rigide regulas grammatical sin exceptiones. Le valores de Interlingua non corresponde con illos del Communitate Europee, que nasceva con un anima mercantil, e ergo plus ligate al anglese que a qualcunque altere lingua.
In veritate, quando io comenciava studiar Interlingua, io subito comprendeva que iste lingua es filia del Renascentia, o melio, del Neo-Renascentia, un movimento que cresce in le mente de multe personas in tote le mundo. Le Nove Renascentia es un hereditage del ration grec, del derecto roman e del sapientia ancestral de tote le culturas. Es un movimento que ha su radices in le humanismo e in le lege natural. Illo es classic in su convictiones, ma non dogmatic ni reactionari. Illo cerca le equilibrio inter le Cielo del spiritualitate e le Terra del scientia. Le Renascentia surge quando le humanitate affronta un crisis de disconnexion con le natura, con le senso transcendental del existentia e le dignitate human. Es un movimento social que comprende que le reductionismo materialista e le technocratia menacia le libertate e le ethica universal. In iste senso, Interlingua reflecte in su essentia iste potente movimento, essente un ponte de iste nove anima collective que comencia a florescer in tote le mundo.
E que es le Nove Renaissance e qual es su nexos con Interlingua? Io va explicar lo in octo principios fundamental:
1. In varietate concordia – Unitate in le diversitate. Interlingua es herede del latino e del greco, linguas fundamental in le Renascentia. In iste linguas esseva scribite tote le libros classic, de historia, de scientias, technic e de philosophia. Hodie, le majoritate del terminos scientific, biologic e technic es exprimite in iste duo linguas. Qual melior maniera de unir culturas sin deler lor identitates, rejectante omne hegemonia linguistic como le anglocentrismo. Le Unitate del Humanitate in un sol projecto commun, ma respectante le diversitate, sin que isto sia obstaculo pro le mutual comprehension e respecto inter tote le esseres human.
2. Homo sapiens et custos – Le humano como sapiente e custodio. Le essere human non es dominator del Terra, ma jardinero e guardiano de su equilibrio. Le scientia e le spiritualitate es alliate: le prime explica le “como” e le secunde le “proque”. Le premissa que le human debe conquistar e subjugar le Terra pertine al passato. Ora le humanitate ha su oculos verso le stellas e in aperir cammino trans le Firmamento.
3. Natura Magistra – Le natura como maestra. Le lege natural es le base de tote ethica human. Omne innovation technologic debe esser subjecte al criterio del lege natural e del sustenibilitate universal. Si alique compromitte iste fundamento, illo debe esser considerate nocive pro le human e ergo neutralisate.
4. Libertas non Licentia – Libertate, non licentia. Le libertate individual fini ubi comencia le harmonia social e le respecto del ambiente. Le rejection del transhumanismo que objectifica le vita e le repulsa al vigilancia massive que annulla le libere autonomia. Le perfectionamento del esser human passa per le necessari processo de regeneration de su conscientia. Le biotechnologia debe solmente esser developpate sub le respecto inalienabile del libere arbitro del esser human, sin impositiones, de qualcunque typo, mesmo in nomine del sanitate global.
5. Lingua Lucis – Lingua del luce. Interlingua es le lingua vehicular e aperte a un cognoscentia accessibile pro omnes, capace de exprimer le plus inspirate poesia mystic o le plus complexe equationes quantic. Interlingua se adapta perfectemente in le diplomatia, le philosophia, le arte e le divulgation scientific.
6. Transcender sine destruere – Transcender sin destruer. Le technologia debe servir pro elevar le conscientia, non pro allinear lo. Le Nove Renascentia aperi le scientia a altere planos de investigation que permitte le accesso a altere statos de conscientia e de manifestation. Scientia e spiritualitate se uni pro amplificar nove vias de exploration que le scientia materialista e le dogmatismo religiose manteneva claudite.
7. Societas sapientum, humanitas cum scientia – Societate de sapientes, humanitate con cognoscentia. Un nove modello de governamento basate in un Consilio de sapientes e le assemblate communal. Un societate holistic ubi on promove un education que fortifica le crescentia spiritual del human, le amor pro le cognoscentia e le natura. Un education que evita le competitivitate e promove le cooperation, que preserva le valores inherente al human, al familia e al concordia social.
8. Prosperitas est labor in servitio omnium – Le prosperitate es le labor al servicio de omnes. Le humanitate del Nove Renascentia non centra su vista in posseder plus o esser plus que alteres. Le nove moneta es le servicio al alteres. Le plus grande honor, servir nostre similes. Developpar technologia pro meliorar le vita de omnes, construir pro dotar le communitate de locos ubi viver e developpar activitates, planificar grande projectos que adjuta a satisfacer tote le necessitates de un communitate, investigar pro meliorar le sanitate e le benesser. Le collaboration, le technologia e le globalisation realisara projectos que nos aperira cammino trans le Stellas.
Interlingua debe posicionar se intra un proprie vision del mundo, sin perder su neutralitate ma con un cammino e perspectivas definite. Il non se tracta de esser de sinistra o de dextra, ma de promover un movimento: isto es le Neo-Renascentia. Un nove Albore in le horizonte human. Iste es le basamento del manifesto de Interlingua del seculo XXI.